"Liverpul" va Portugaliya termasi hujumchisi avtohalokat qurboni boʻldi
Diogu Jota bu yil Angliya chempioni boʻlgandi, terma jamoa bilan esa Millatlar Ligasida gʻolib chiqqandi.
"Liverpul" va Portugaliya terma jamoasi hujumchisi Diogu Jota 28 yoshida vafot etdi, deb xabar beradi Marca.
Jota Ispaniyaning Samora provinsiyasida avtohalokatga uchradi.
Maʼlumotlarga koʻra, YTH Palasios-de-Sanabriya munitsipaliteti hududida sodir boʻlgan. Futbolchi 26 yoshli ukasi Andre bilan birga boʻlgan mashina yoʻldan uchib chiqib ketgan va yonib ketgan.
22 iyun kuni Jota oila qurgandi.
"Liverpul" tarkibida portugaliyalik futbolchi Angliya chempioni boʻldi, mamlakat kubogi va Angliya liga kubogini (ikki marta) qoʻlga kiritdi.
Diogu 2020 yildan beri "qizillar" safida toʻp suradi. Ilgari u "Vulverxempton", "Atletiko", "Portu" va "Pasos de Ferreyra" klublari sharafini himoya qilgan. Portugaliya terma jamoasi bilan birgalikda Jota ikki marta UYeFA Millatlar ligasida gʻolib chiqdi.