Yangiariq tuman sudining tergov sudyasi ushlandi
U fuqaroga jinoyat ishi boʻyicha yordam berish evaziga muqaddam olgan pullarning bir qismini qaytarayotgan boʻlgan.
Xorazmda sudya qoʻlga olindi. Bu haqda Oliy sud xabar berdi.
Bugun Oliy sud tashabbusi bilan huquqni muxofaza qiluvchi organ xodimlari tomonidan oʻtkazilgan tezkor tadbirda jinoyat ishlari boʻyicha Yangiariq tuman sudining tergov sudyasi M. S. fuqaro O. R.ga oid jinoyat ishi boʻyicha yordam berish evaziga muqaddam olgan pullarning bir qismini arizachining talabi bilan qaytargan vaqtida ashyoviy dalillar bilan ushlandi.
"Oliy sud keng jamoatchilik eʼtiborini sud organlarida korrupsiyaga qarshi murosasiz va keskin kurash boʻyicha qatʼiy choralar koʻrilayotganiga qaratib, sud tizimini nopok kadrlardan tozalash borasida barcha zarur saʼy-harakatlar amalga oshirilayotganligini maʼlum qiladi", deyiladi xabarda.
Avvalroq Denov tumani sudi sobiq raisi besh yilga qamalgandi.