Tramp Suriyaga qarshi sanksiyalarni bekor qildi
Ammo sobiq prezident Bashar Asadga qarshi cheklovlar oʻz kuchida qolgan.
AQSh Suriyaga qarshi sanksiyalarni bekor qildi, ammo Bashar Asadga nisbatan sanksiyalarni oʻzi kuchida qoldirdi.
AQSh yetakchisi Tramp AQShning Suriyaga qarshi 2004 yildan beri amal qilib kelayotgan sanksiyalarini toʻxtatish toʻgʻrisidagi farmonni imzoladi. Bu haqda Oq uy xabar berdi.
“Donald Tramp Suriyaning tinchlik va barqarorlikka intilishini qoʻllab-quvvatlash maqsadida unga qarshi sanksiyalarni bekor qilish toʻgʻrisidagi tarixiy farmonni imzoladi”, — deya xabar berdi AQSh prezidenti maʼmuriyati.
Boshqa narsalar qatorida, Trampning farmoni baʼzi tovarlar boʻyicha eksport nazoratini zaiflashtiradi va mamlakatga xorijiy yordam boʻyicha cheklovlarni bekor qiladi.
AQSh Suriya hukumatini Isroil bilan munosabatlarni normallashtirishga va xorijiy terrorchilarga qarshi samarali kurash olib borishga chaqirdi.
Moskvaga qochgan Bashar Asad va uning tarafdorlariga qarshi sanksiyalar kuchda qolmoqda.
Eslatib oʻtamiz, Tramp Saudiya Arabistonida Suriyaning muvaqqat rahbari Ahmad ash-Sharaa bilan uchrashgan va sanksiyalarni bekor qilishini aytgandi.