Xorazmda favqulodda vaziyatlar tizimining ikki xodimi qoʻlga olindi
Ulardan biri Xorazm viloyati FVBga ishga kiritib qoʻyish evaziga 1,5 ming dollar talab qilgan.
Xorazmda FVV tizimining 2 nafar xodimining noqonuniy harakatlariga chek qoʻyildi
Tuproqqalʼa tumani Favqulodda vaziyatlar boʻlimi xodimi Xazorasp tumanida yashovchi fuqaroning ishonchiga kirib, mansabdor tanishlari orqali uni Xorazm viloyati favqulodda vaziyatlar boshqarmasiga ishga kiritib qoʻyishni vaʼda qilgan. Buning evaziga 1500 AQSh dollari talab qiladi.
DXXning Xorazm viloyati boʻyicha boshqarmasi hamda IJQK Departamenti hamkorligida oʻtkazilgan tezkor tadbirda u oldindan 400 AQSh dollari va 1 mln 300 ming soʻm olgan vaqtida ashyoviy dalillar bilan ushlandi.
Shovot tumani Favqulodda vaziyatlar boʻlimi xodimi ham oʻzganing ishonchiga kirib, ichki ishlar organlaridagi tanishlari orqali unga haydovchilik guvohnomasi olib berishini aytib, evaziga 1400 AQSh dollari va 1 mln 300 ming soʻm olganlik holati hujjatlashtirildi.
Hozirda mazkur favqulodda vaziyatlar qutqaruvchilariga nisbatan Jinoyat Kodeksining 168, 211-moddalari bilan jinoyat ishlari qoʻzgʻatilib, tergov harakatlari olib borilmoqda.
Avval DXX giyohvand moddalar sotilgan narkodoʻkonni aniqlagandi.