Dunyodagi eng qurgʻoqchil choʻlda qor yogʻdi
Choʻlda qurgʻoqchilik sabab bulutli kunlar deyarli boʻlmaydi. Bu Atakamani rasadxonalarni joylashtirish uchun mos joyga aylantirgan.
Chili shimolidagi Atakama choʻliga qor yogʻdi. Bu haqda ALMA observatoriyasi X ijtimoiy tarmogʻida xabar berdi.
"Ajablanarli! Dunyodagi eng qurgʻoqchil boʻlgan Atakama choʻli qor bilan qoplandi!" deyiladi observatoriya bayonotida.
Taʼkidlanishicha, bu hodisa oʻn yil ichida birinchi marta kuzatilmoqda.
Atakamada yogʻingarchilikning oʻrtacha miqdori yiliga 50 mmdan oshmaydi. Mahalliy aholi suv toʻplash uchun "tuman kollektorlari" dan foydalanadi - bu devorlari neylon iplardan yasalgan odam balandligidagi silindrlardir.
Bir kun davomida qurilma tomonidan yigʻilgan kondensat 18 litr hajmga etadi.
Choʻlda qurgʻoqchilik boʻlgani uchun bulutli kunlar deyarli boʻlmaydi. Bu Atakamani rasadxonalarni joylashtirish uchun mos joyga aylantiradi. U erda joylashgan ALMA (Atacama Large Millimeter Array) dunyodagi eng katta va eng qimmat astronomik obʼekt hisoblanadi.