Trampga qarshi impichment jarayoni muvaffaqiyatsizlikka uchradi
Tashabbusga AQSh harbiylarining Eron yadroviy inshootlariga havo hujumlari sabab boʻlgan va bu Kongressning ruxsatisiz amalga oshirilgan.
AQSh Kongressining Vakillar palatasi demokrat kongressmen Al Grinning (Texas) prezident Donald Trampga impichment eʼlon qilishga chaqiruvchi rezolyutsiyasini rad etdi.
Tashabbusga AQSh harbiylarining Eron yadroviy inshootlariga havo hujumlari sabab boʻlgan va bu hujumlar Kongressning ruxsatisiz amalga oshirilgan.
CNN maʼlumotlariga koʻra, Grin rezolyutsiyasi uchun atigi 79 nafar demokrat ovoz bergan, 344 nafar kongressmen, jumladan, barcha respublikachilar va Demokratik partiyaning 128 vakili qarshi ovoz bergan.
Grin hujjatni 24 iyun kuni taqdim etdi. Unda kongressmen prezidentni oʻz vakolatini suiisteʼmol qilishda ayblab, Tramp AQShga bevosita tahdid boʻlmaganiga qaramay, Kongress ruxsatisiz harakat qilganini taʼkidladi.
Kongressmenning aytishicha, bu kabi harakatlar Amerika demokratiyasi asoslariga putur yetkazadi va mamlakatni avtoritarizm yoʻliga olib boradi.
Demokrat Aleksandriya Okasio-Kortes avvalroq davlat rahbariga nisbatan xuddi shunday tanqid qilgan edi. 22 iyun kuni u Kongressning ruxsatisiz Eronga qarshi harbiy chora koʻrish qarori “impichment uchun mutlaq va aniq asos” ekanini aytdi.
Donald Tramp 2019 yil dekabrida, prezidentlik faoliyatining birinchi davridayoq impichment jarayonining asosiy mavzusi boʻlgan edi.
Keyin u hokimiyatni suiisteʼmol qilish va Kongress ishiga toʻsqinlik qilishda ayblangan. Ikkala modda ham Vakillar palatasi tomonidan maʼqullangan, ammo 2020 yil fevral oyida Senat impichmentni tasdiqlamay, prezidentni oqladi.
Joriy tashabbus Eron va Isroil oʻrtasidagi ziddiyat keskin kuchaygan bir paytda paydo boʻldi. 13 iyun kuni Isroil armiyasi Eron yadro inshootlariga zarba berib, yadroviy tadqiqotlar bilan shugʻullangan bir qator yuqori martabali eronlik harbiy xizmatchilar va olimlarni oʻldirdi. Bunga javoban Tehron Tel-Avivga raketa va dronlarni uchirdi.
22 iyun kuni Qoʻshma Shtatlar operatsiyaga qoʻshildi va Eronning uchta asosiy yadroviy obʼektlariga - Fordo, Natanz va Isfahonga havo hujumlarini boshladi, shundan soʻng Tehron va Tel-Aviv oʻt ochishni toʻxtatishni eʼlon qildi.