Oʻzbekiston va Moʻgʻuliston oʻrtasida keng qamrovli sheriklik munosabatlari oʻrnatildi

Oʻzbekiston va Moʻgʻuliston rahbarlari mamlakatlar oʻrtasida keng qamrovli sheriklik munosabatlari oʻrnatishga kelishdilar.

Ulan-Bator shahrida oʻtgan oliy darajadagi muzokaralar yakunida Oʻzbekiston Respublikasi Prezidenti Shavkat Mirziyoyev va Moʻgʻuliston Prezidenti Uxnaagiyn Xurelsux Keng qamrovli sheriklik munosabatlarini oʻrnatish toʻgʻrisidagi qoʻshma deklaratsiyani imzoladilar.

Shuningdek, Prezidentlar huzurida quyidagi hujjatlar imzolandi:

- oʻsimliklar karantini va himoyasi, oliy taʼlim, togʻ-kon sanoati, atrof-muhitni muhofaza qilish, jinoyatchilikning oldini olish va unga qarshi kurashish, sogʻliqni saqlash va tibbiyot fani, jismoniy tarbiya va sport sohalarida hamkorlik toʻgʻrisidagi bitimlar;

- ikki mamlakat arxiv idoralari oʻrtasidagi hamkorlik toʻgʻrisida bayonnoma;

- Oʻzbekiston Respublikasi Investitsiyalar, sanoat va savdo vazirligi bilan Moʻgʻuliston Iqtisodiyot va taraqqiyot vazirligi oʻrtasida, tashqi ishlar vazirliklari oʻrtasida 2026-2027 yillarga moʻljallangan, Oʻzbekiston Respublikasi Madaniyat vazirligi bilan Moʻgʻuliston Madaniyat, sport, turizm va yoshlar vazirligi oʻrtasida 2025-2028 yillarga moʻljallangan hamkorlik dasturlari;

- Oʻzbekiston Respublikasi Qishloq xoʻjaligi vazirligi va Moʻgʻuliston Oziq-ovqat, qishloq xoʻjaligi va yengil sanoat vazirligi oʻrtasida qishloq xoʻjaligi sohasidagi hamkorlikni kengaytirish boʻyicha hamkorlik rejasi;

- Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi bilan Moʻgʻuliston Madaniyat, sport, turizm va yoshlar vazirligi oʻrtasida ekoturizm sohasidagi harakatlar rejasi.

Avvalroq Shavkat Mirziyoyev Moʻgʻulistonda tantanali kutib olingandi.