Tahlil: Toshkent supermarketlarida kartoshka, pomidor va goʻsht arzonlashdi
Limon narxi esa sezilarli qimmatlagan. Bu mavsumiy omil bilan izohlanmoqda.
Toshkent supermarketlarida kartoshka, pomidor, bodring, goʻsht (file) kabi mahsulotlar arzonlashdi.
2025 yilning iyun oyida Toshkent shahridagi supermarketlarda oziq-ovqat mahsulotlari narxining oʻzgarishi haqida maʼlumot berildi.
Vazirlar Mahkamasi huzuridagi Makroiqtisodiy va hududiy tadqiqotlar instituti (MHTI) mutaxassislari 2025-yilning iyun oyida Toshkent shahridagi yirik supermarketlarda 21 nomdagi oziq-ovqat mahsulotlari narxining oʻzgarishini koʻrib chiqdi.
Monitoring natijalari 9 nomdagi mahsulot boʻyicha minimal narxlar oʻtgan oydagiga nisbatan pasayganligini koʻrsatdi.
Shunday qilib, oqbosh karamning minimal narxi 64,2 foiz, pomidorniki 44,7 foiz, bodringniki 36,5 foiz, lavlaginiki 21,5 foiz, bananniki 13,0 foiz, olmaniki 8,4 foiz, guruchniki 7,3 foiz, mol goʻshtiniki (file) 6,3 foiz, kartoshkaniki 6,0 foiz pasaygan.
6 nomdagi mahsulot boʻyicha minimal narxlar oshgan. Ayniqsa, limon narxida eng katta oʻsish qayd etildi. Bu mavsumiy omil bilan bogʻliq.
6 mahsulotning eng past narxlari oʻzgarishsiz qolgan. Bular - bugʻdoy uni, grechka, makaron, tuxum, margarin, kungaboqar yogʻi.
Tahlil 2025 yil 7 may va 12 iyun kunlari oʻtkazilgan monitoring maʼlumotlari asosida amalga oshirildi.
Eslatib oʻtamiz, bir necha kun avvalgi videoselektorda prezident goʻsht, sut va tuxum narxiga toʻxtalgandi.