Oʻzbekiston ukrainalik oʻquvchi bolalarga 2 mingta oʻquv qurollari toʻplami sovgʻa qildi
Ukrainaning Oʻzbekistondagi elchixonasi bu haqda maʼlum qilgan.
Oʻzbekiston ukrainalik birinchi sinf oʻquvchilar uchun 2000 ta oʻquv qurollari toʻplamini sovgʻa qildi.
Bu haqda Ukrainaning Oʻzbekistondagi elchixonasi maʼlum qildi.
Elchixona urushdan jabr koʻrgan oilalarning 97 nafar bolasi uchun tashkil etilgan unutilmas taʼtil uchun chin dildan minnatdorchilik bildirdi.
5 iyundan 17 iyungacha — ikki hafta davomida ular Oʻzbekistonda boʻldi.
Ukraina elchixonasi Oʻzbekiston tomonining tashabbusi bilan amalga oshirilgan ushbu taʼsirli tashabbus xalqlar oʻrtasidagi chuqur doʻstlik va birdamlikning yorqin dalili ekanini bildirdi.
“Saxovatli gumanitar yuk – boʻlajak maktab oʻquvchilarimiz uchun ajoyib sovgʻa boʻladigan 2000 ta birinchi sinf oʻquvchisi toʻplami uchun alohida tashakkur. Bunday yordam Ukraina uchun bebaho boʻlib, qoʻllab-quvvatlashga muhtoj bolalarga umid va tabassumlar hadya etadi. Biz sizning insonparvarligingiz va ochiqligingizni chuqur qadrlaymiz! Birgalikda biz mustahkam kelajak quramiz”, deyiladi elchixona xabarida.