Hindistonda bortida 242 kishi boʻlgan samolyot halokatga uchradi
Hodisa tafsilotlari oʻrganilmoqda, qurbonlar boʻyicha aniq raqamlar eʼlon qilinmagan.
Hindistonda yoʻlovchi samolyoti halokatga uchradi.
OAV xabarlariga koʻra, Air India aviakompaniyasining Londonga yoʻl olgan va bortida yuzlab yoʻlovchi boʻlgan reysida Ahmadobod aeroportidan koʻtarilgach falokat yuz bergan.
India Today xabariga koʻra, bortda 242 kishi boʻlgan. Times of India gazetasining aniqlik kiritishicha, halokatga uchragan samolyot Boeing 787 Dreamliner boʻlgan.
Air India aviakompaniyasi X ijtimoiy tarmogʻida reys Ahmadoboddan Londondagi Gatvik aeroportiga uchishi kerakligi haqida xabar berdi.
Xabarda aytilishicha, kompaniya hozirda hodisa tafsilotlarini oʻrganmoqda.
Ommaviy axborot vositalari halokat joyidan tutun ustuni aks etgan fotosuratlar va videolarni nashr etmoqda.
Halok boʻlganlar va jarohatlanganlar haqida hozircha aniq maʼlumot yoʻq.