Mebelsozlik mahsulotlari importida 1 foizlik stavka qoʻllaniladi
2025 yil 1 iyuldan oʻz xonadonida faoliyat yuritadigan YaTTlarga mebel mahsulotlarini tayyorlash faoliyati bilan shugʻullanish huquqi beriladi.
Mebel va yogʻochsozlik sanoati rivojlanishi uchun qulay sharoitlar yaratiladi.
“Mebel va yogʻochsozlik sanoatining rivojlanishi uchun qulay shart-sharoitlar yaratishga oid qoʻshimcha chora-tadbirlar toʻgʻrisida”gi Prezident qarori (PQ-193-son, 27.05.2025 y.) qabul qilindi.
Qarorga koʻra, 2025–2028 yillarda mebel va yogʻochsozlik sanoatini rivojlantirishning asosiy maqsadli koʻrsatkichlari etib quyidagilar belgilandi, jumladan:
- mebel va yogʻochsozlik mahsulotlari ishlab chiqarish hajmini 30 foizga oshirish;
- eksport hajmini 100 mln AQSh dollariga yetkazish;
- sohada 50 ming nafar aholini daromadli mehnat bilan taʼminlash.
2029 yil 1 yanvargacha Qarorda belgilangan mebel ishlab chiqarishda foydalaniladigan xomashyo, ehtiyot qismlar, furnitura va aksessuarlar importida bojxona boji 1 foiz stavkada qoʻllaniladi.
2025 yil 1 iyuldan oʻz xonadonida faoliyat yuritadigan YaTTlarga mebel mahsulotlarini tayyorlash faoliyati bilan shugʻullanish huquqi beriladi.
2025 yil 1 avgustdan mahalliy mebel texnologlari uchun rivojlangan xorijiy mamlakatlardagi nufuzli tashkilotlarning sohaga tegishli boʻlgan malaka sertifikatlarini olish xarajatlarining 50 foizi qoplab beriladi.
