Taniqli akademik vafot etdi
Janoza 28 may kuni peshin namozidan soʻng Zangiota ziyoratgohida boʻlib oʻtadi.
Oʻzbekiston Fanlar akademiyasi akademigi, Oʻzbekiston milliy universiteti Matematik analiz kafedrasi professori, fizika-matematika fanlari doktori, taniqli matematik olim Azimboy Saʼdullayev 78 yoshida vafot etdi.
Azimboy Saʼdullayev oʻzining boy ilmiy merosi, fidokorona mehnati, yuqori salohiyatli pedagoglik faoliyati, halolligi va insoniy fazilatlari bilan eʼtirofga sazovor boʻlgan.
Marhum tomonidan yaratilgan ilmiy maktab, yetishtirilgan shogirdlar va olib borilgan fundamental tadqiqotlar nafaqat yurtimizda, balki xalqaro miqyosda ham eʼtirof etilgan. Olimning "Koʻp kompleksli oʻzgaruvchili funksiyalar nazariyasi" va "Kompleks potensiallar nazariyasi" sohasidagi ilmiy ishlari dunyo matematiklarining hurmatini qozongan.
Maʼlumot uchun: janoza 2025 yil 28 may kuni peshin namozidan soʻng Zangiota ziyoratgohida boʻlib oʻtadi.