"Oʻzgidromet" iyun oyida kutilayotgan ob-havo maʼlumotini eʼlon qildi
Bu yil issiq kunlar aprel oyida ham kuzatilganligi sababli, ushbu yilning yoz fasli qanday boʻladi, degan savol koʻpchilikni qiziqtirib kelmoqda. Bu savolga javob berish juda murakkabdir.
Gidrometeorologiya xizmati yaqinlashayotgan iyun oyida ob-havo qanday boʻlishi mumkinligini maʼlum qildi.
Bu yil yoz quruq va biroz issiq ob-havo bilan boshlanadi. 1-7 iyun kunlari respublika boʻyicha asosan yogʻingarchiliksiz ob-havo kuzatiladi. Havo harorati asta-sekin 35-38 darajagacha, shimolda, janubda va choʻl hududlarda 40 darajagacha koʻtariladi.
Keyinchalik oy oxirigacha harorat 33-38 darajadan 25-30 darajagacha oʻzgarib turishi kutilmoqda. Respublikaning shimoliy, janubiy va choʻl hududlarida eng issiq kunlarda harorat 39-41 darajagacha koʻtariladi.
Birinchi oʻn kunlik oxirida, ikkinchi va uchinchi oʻn kunliklarda ayrim kunlarda qisqa muddatli yomgʻir yogʻishi ehtimoli bor.
Bu yil issiq kunlar aprel oyida ham kuzatilganligi sababli, ushbu yilning yoz fasli qanday boʻladi, degan savol koʻpchilikni qiziqtirib kelmoqda. Bu savolga javob berish juda murakkabdir.
Sayyoramizda sodir boʻlayotgan global isish haqiqatan ham yozning juda issiq boʻlish xavfini oshiradigan omillardan biridir.
Shu bilan birga, global isish yillararo yuqori oʻzgaruvchanlik fonida sodir boʻlmoqda. Bu har bir keyingi yoz fasli avvalgisiga qaraganda iliqroq boʻladi degani emas.
Bundan tashqari, 2025 yil boshida okeanning isishiga olib keladigan El-Nino hodisasi yakunlandi va okean neytral holatga qaytdi.
Biroq, kuchli El-Ninodan keyin okean yuzasi harorati ancha yuqori boʻlib qolmoqda, bu esa atmosfera holatiga taʼsir qiladi: okeanlardan uzatiladigan issiqlik havo haroratining oshishiga sabab boʻladi.
Biroq, bu issiqlik butun dunyo boʻylab qanday taqsimlanishini aytish mumkin emas.
Oʻzbekistonda yoz asosan quruq va issiq boʻladi – bu bizning Oʻrta Osiyo iqlimimizning oʻziga xos xususiyatlaridan biridir. Bundan tashqari, soʻnggi 50 yil ichida yoz fasllarining oʻrtacha harorati koʻtarilishi barqaror tendensiyasi kuzatilib kelinmoqda.
"Oʻzgidromet"ning jahon prognozlash markazlari hisob-kitoblariga asoslangan dastlabki bahosiga koʻra, bu yilgi yoz faslining oʻrtacha harorati meʼyordan biroz yuqori boʻlishi kutilmoqda.
Yozgi mavsum davomida, albatta, ekstremal qiymatlarga yaqin boʻlgan havo harorati bilan juda issiq ob-havo davrlari ham qayd etiladi. Ammo yoz uchun nisbatan qulay harorat fonida issiqning pasayish davrlari ham kuzatiladi.