Normat Tursunov tibbiyot sohasi uchun 10 mlrd soʻm ajratdi
Pullar Xatirchi tumanidagi tibbiyot muassasalarida kutish joylarida qulay oʻrindiqlarni koʻpaytirib, navbatni tartibga keltirish, “ona va bola” xonalarini tashkil qilish, issiq suv tizimi va boshqalarga sarflanadi.
Navoiy viloyati hokimi Normat Tursunov mablagʻ ajratish boʻyicha farmoyishni imzoladi. Farmoyish 2025 yil 26 may kuni eʼlon qilingan.
Unga koʻra, Xatirchi tumani tibbiyot birlashmasiga qarashli tibbiyot muassasalaridagi kutish joylarida qulay oʻrindiqlarni koʻpaytirib, navbatni tartibga keltirish, “ona va bola” xonalarini tashkil qilish, nogironligi boʻlgan fuqarolar erkin harakatlanishi uchun kirish-chiqish joylari, xona va yoʻlaklarda inklyuziv muhitni yaratish, qoʻl yuvishga issiq suvi bor pokiza hojatxonalarni tashkil etish hamda moddiy-texnika bazasini mustahkamlash, tajriba sinov loyihasini joriy qilish bilan bogʻliq zarur xarajatlar uchun viloyat mahalliy budjetining 2025 yil I chorak daromadlarni rejadan orttirilib bajarilgan qismi hisobidan 10,0 mlrd. soʻm mablagʻni quyidagicha yoʻnaltiriladi:
- Xatirchi tuman tibbiyot birlashmasiga 5 mlrd soʻm:
-viloyat hokimligi "Yagona buyurtmachi xizmati" DUKka 5 mlrd soʻm.
Mazkur farmoyish ijrosini nazorat qilish viloyat hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari R. Sulaymonov zimmasiga yuklangan.
Avvalroq Fargʻona viloyati hokimi byudjetdan 10 mlrd ajratgandi.