Soliq inspektori va sud-ekspertiza markazi xodimiga nisbatan jinoiy ish ochildi
Inspektor trikotaj mahsulotlari ishlab chiqarish va ulgurji savdosi bilan shugʻullanuvchi MChJning soliq qarzdorligini undirmasdan, uni bankrotlik asosida tugatib berish evaziga pul olayotgan boʻlgan.
Xorazmda soliq inspektoriga, Qashqadaryoda esa sud-ekspertiza markazi xodimiga nisbatan jinoyat ishi qoʻzgʻatildi.
Xorazm viloyati Yangiariq tumani davlat soliq inspeksiyasining mahallalarga biriktirilgan soliq inspektorlari shoʻʼbasi davlat soliq inspektori trikotaj mahsulotlari ishlab chiqarish va ulgurji savdosi bilan shugʻullanuvchi MChJning soliq qarzdorligini undirmasdan, uni bankrotlik asosida tugatib berish evaziga oʻzining yaqin aloqasi orqali 900 AQSh dollari olgan vaqtida ashyoviy dalillar bilan ushlandi.
Hozirda soliq inspektoriga nisbatan Jinoyat Kodeksining 168-moddasi 3-qismi “v” bandi bilan jinoyat ishi qoʻzgʻatilib, tergov harakatlari olib borilmoqda.
Qashqadaryo viloyatida kuzatilgan holatda esa Yakkabogʻ tumanida yashovchi, 1985 y.t., muqaddam sudlangan shaxs chorvachilikka ixtisoslashgan fermer xoʻjalik tomonidan suv taʼminotiga noqonuniy ulanib, foydalanganligi holati boʻyicha aniqlangan 99 mln. soʻmlik zararni tegishli tashkilot ekspertlari orqali yoʻq qilib berish evaziga, fermer xoʻjalikning ish boshqaruvchisidan 1500 AQSh dollari olgan vaqtida ushlandi.
Shuningdek, tezkor tadbir davom ettirilib, Xadicha Sulaymonova nomidagi Respublika sud-ekspertiza markazining Qashqadaryo viloyat boʻlinmasi eksperti ushbu 1500 AQSh dollarini olgan vaqtida ashyoviy dalillar bilan ushlandi.
Hozirda fuqaro va ekspertga nisbatan Jinoyat Kodeksining 168-moddasi 3-qismi “v” bandi va 28,211-moddasi 1-qismi bilan jinoyat ishi qoʻzgʻatilib, tergov harakatlari olib borilmoqda.