Shavkat Mirziyoyev Sloveniyaga tashrif buyurdi
Oʻzbekiston yetakchisi Sloveniya prezidenti Natasha Pirs Musar bilan muzokaralar oʻtkazadi, mamlakat parlamenti va hukumati rahbariyati bilan uchrashuvlar oʻtkazadi, qoʻshma biznes forumida ishtirok etadi.
Oʻzbekiston Respublikasi Prezidenti Shavkat Mirziyoyev Sloveniya Respublikasi Prezidenti Natasha Pirs Musarning taklifiga binoan rasmiy tashrif bilan Lyublyanaga keldi.
Samolyot oldida davlat rahbarini Bosh vazir oʻrinbosari - tashqi ishlar vaziri Tanya Fayon va boshqa rasmiy shaxslar kutib oldi.
Yoje Puchnik nomidagi xalqaro aeroportda oliy martabali mehmon sharafiga ikki mamlakat davlat bayroqlari koʻtarildi, faxriy qorovul saf tortdi.
Tashrif dasturiga muvofiq, Oʻzbekiston yetakchisi Sloveniya Prezidenti Natasha Pirs Musar bilan muzokaralar oʻtkazadi, mamlakat parlamenti va hukumati rahbariyati bilan uchrashuvlar oʻtkazadi, qoʻshma biznes forumida ishtirok etadi.
Oʻzaro manfaatli savdo-iqtisodiy sheriklikni rivojlantirish, sanoat, farmatsevtika, elektrotexnika, "yashil" energetika, qishloq xoʻjaligi sohalarida kooperatsiya loyihalarini amalga oshirish, mehnat migratsiyasi boʻyicha hamkorlik va gumanitar aloqalarni kengaytirish masalalari koʻrib chiqiladi.