Samarqandda oʻquvchilar oʻrtasidagi janjalda bir kishi vafot etdi
Janjal ijtimoiy tarmoqdagi tortishuvdan kelib chiqqani aytilmoqda.
Samarqandda oʻquvchilarning oʻzaro janjali oʻlim bilan tugadi. Bu haqda "Millar" dasturida maʼlum qilindi.
Maʼlum qilinishicha, Samarqand viloyati Paxtachi tumanidagi maktab oʻquvchilari oʻrtasida janjal kelib chiqqan.
Janjal tumandagi 1-maktabning 3 nafar oʻquvchisi va 12- maktabning 2 nafar oʻquvchisi oʻrtasida yuz bergan. Oqibatda oʻquvchilardan biri voqea joyida vafot etgan.
Oʻquvchilar oʻrtasidagi janjalga ijtimoiy tarmoqlardagi tortishuv sabab boʻlgan. Oʻquvchilar Instagram'dagi izohlar boʻlimida gap talashib, bir-birini haqoratlagan, deyiladi dasturda.
"Voqea joyiga borganimizda biologik oʻlim qayd etilgan edi. Bemorda koʻz qorachiqlarining maksimal kengayishi, yirik arterial va venalarda pulsning va yirik jarohatlarning yoʻqligi, boʻyin atrofida shikastlanish belgilari, ogʻiz hamda burun atrofida qon izlari aniqlangan",- deydi shifokor.
Mazkur holat yuzasidan Paxtachi tumani IIB tomonidan JKning 104-moddasi 3-qismi "d" bandi (qasddan badanga ogʻir shikast yetkazish jabrlanuvchining oʻlishiga sabab boʻlishi) bilan jinoyat ishi qoʻzgʻatilgan. Voyaga yetmagan oʻquvchilar gumonlanuvchi shaxs sifatida ushlanib,ularga nisbatan qamoqqa olish tarzidagi ehtiyot chorasi qoʻllanilgan.