Jo Baydenda saraton kasalligi aniqlandi
Xastalik allaqachon tajovuzkor shaklga kirgan, lekin davolash imkoniyatlari borligi aytilmoqda.
AQSh sobiq prezidenti Jo Baydenga prostata saratoni tashxisi qoʻyildi.
82 yoshli Jo Baydenda topilgan saraton agressiv shaklda, suyaklarga metastazlar tarqalgan, deb xabar beradi Reuters.
AQSh sobiq prezidentining idorasi tashxis 16 may kuni siydik disfunksiyasi belgilari paydo boʻlganidan keyin qoʻyilganini aytdi. Bayden va uning oilasi endi shifokorlar bilan davolanish imkoniyatlarini koʻrib chiqmoqda.
"Bu kasallikning yanada tajovuzkor shakli boʻlsa-da, saraton gormonlarga sezgir boʻlib koʻrinadi, bu uni samarali davolashga imkon beradi", dedi uning idorasi.
Baydenning idorasi kasallik prostata saratonining tajovuzkorligini aniqlash uchun ishlatiladigan Glison shkalasi boʻyicha 10 balldan toʻqqiz ballga baholanganini aytdi.
Prezidentlikka kelganidan beri Baydenni bir necha bor tanqid qilgan Donald Tramp 18 may kuni Truth Social platformasidagi postida unga va uning rafiqasi Jillga hamdardlik bildirdi:
"Melaniya va men Jo Baydenga yaqinda qoʻyilgan tibbiy tashxis haqida qaygʻurdik. Jill va oilasiga, Joga esa tez va muvaffaqiyatli tuzalib ketishini eng samimiy va eng yaxshi tilaklarimizni tilaymiz".
2020 yilda saylangan paytda Bayden AQSh prezidentlik saylovlarida gʻalaba qozongan eng keksa odam edi. 78 yoshli Tramp esa bu rekordni oʻtgan yili vitse-prezident Kamala Xarrisni magʻlub etib takrorladi.