"Suv yetkazib berish xizmati" davlat muassasasi hisobchisiga hukm oʻqildi

Jinoyat ishlari boʻyicha Arnasoy tuman sudining ochiq sayyor sud majlisida sobiq hisobchiga nisbatan sud ishi koʻrib chiqildi. Sud hukmi Platina.uz ixtiyorida mavjud.

Maʼlum boʻlishicha, S.Ya. Arnasoy tuman “Suv yetkazib berish xizmati” davlat muassasasi bosh hisobchisi lavozimida ishlab kelgan. U mansabdor shaxs boʻla turib, noqonuniy ravishda muassasa xodimlariga ustama yozib, jami 392.041.900 soʻm juda koʻp miqdordagi byudjet mablagʻlarini oʻzlashtirish va rastrata qilish yoʻli bilan talon-toroj qilgan.

Sudlanuvchi S.Ya. sudda aybiga toʻliq iqrorlik bildirgan. S.Ya. sudda oʻz qilmishiga toʻliq iqrorlik bildirib bergan koʻrsatuvidan tashqari, uning aybi guvohlar koʻrsatmalari va boshqa dalillar bilan isbotini topdi.

Yakuniy hukmga koʻra, sudlanuvchi S.Ya. JKning 167-moddasi 3-qismi “a” bandida nazarda tutilgan jinoyatni sodir etganlikda aybli deb topildi. Unga 2 yil mansabdorlik va moddiy javobgarlik yuklatilgan vazifalarda ishlash huquqidan mahrum qilinib, ish haqining 20 foizi miqdorini davlat daromadi hisobiga ushlab qolgan holda 2 yil axloq tuzatish ishlari jazosi tayinlandi.

Ish boʻyicha yetkazilgan zarar toʻliq qoplangan.

Sud ishi Oliy sud portalidan olindi.