Yoshlar parlamentiga saylovlar yakunlandi
Deputatlik oʻrinlaridan 64 nafari OʻzLiDeP, 29 nafari “Milliy tiklanish”, 21 nafari “Adolat” SDP, 20 nafari XDP, 16 nafari Ekopartiyaga toʻgʻri keldi.
23-30 aprel kunlari Oliy Majlis Qonunchilik palatasi huzuridagi Yoshlar parlamentining yangi tarkibi uchun navbatdagi saylovlarning respublika bosqichi boʻlib oʻtdi.
20 mart-1 aprel kunlari siyosiy partiyalarda Yoshlar parlamentiga saylovlarning birinchi bosqichi barcha tuman va shaharlarda oʻtkazildi. Ushbu bosqichda respublika boʻyicha jami 9531 ta ariza kelib tushgan. Tuman (shahar) saralash bosqichi hakamlar hayʼatining xulosasiga koʻra, jami 2493 nafar ishtirokchi saylovning ikkinchi – hududiy bosqichida ishtirok etdi. Hududiy bosqichlardan esa jami 530 nafar ishtirokchi saylovning uchinchi – siyosiy partiyalar tomonidan respublika bosqichida qatnashdi.
Respublika bosqichi yakuniga koʻra, tavsiya etilgan 150 nafar nomzod roʻyxati Oliy Majlis Qonunchilik palatasining Yoshlar masalalari boʻyicha komissiyasiga taqdim etildi. Yoshlar parlamenti aʼzolari siyosiy partiyalarning Qonunchilik palatasida egallagan deputatlik oʻrinlariga mutanosib ravishda quyidagicha oʻrinlarga ega boʻldi: 64 nafari OʻzLiDeP, 29 nafari “Milliy tiklanish”, 21 nafari “Adolat” SDP, 20 nafari XDP, 16 nafari Ekopartiyaga toʻgʻri keladi.
Yoshlar parlamentining yangi tarkibi yoshlar masalalarini hal etish, yoshlarning huquq va manfaatlarini himoya qilish, gʻoya va tashabbuslarini roʻyobga chiqarish hamda ularni islohotlar jarayoniga faol jalb etishda tashabbuskor boʻlishi aytilgan.