Sergeli tumanida omborxona yonib ketdi
Yongʻin deyarli 2,5 soatda oʻchirilgan. Jarayonga Favqulodda vaziyatlar vaziri Botir Qudratxoʻjayev boshchilik qilgan.
Toshkent shahri Sergeli tumanida omborxona yondi. Yongʻin deyarli 2,5 soatda oʻchirildi.
Sergeli tumani Nilufar koʻchasida joylashgan omborxonada yongʻin sodir boʻlayotgani haqida shahar FVBga murojaat kelib tushgan.
Xabarga asosan, soat 11:05 da 12 ta ekipaj yongʻin joyiga yetib borgan va bartaraf etish ishlariga kirishgan. Yongʻin soat 12:15 da qurshab olindi va soat 13:31 da batamom oʻchirildi. Ushbu yongʻinni bartaraf etish ishlari Favqulodda vaziyatlar vaziri Botir Qudratxoʻjayev va vazirning birinchi oʻrinbosari S. Zuparovlar boshchiligida amalga oshirildi.
Tan jarohati olganlar toʻgʻrisida maʼlumot kelib tushmadi.
Yongʻinni keltirib chiqargan sabablar hamda yetkazilgan zarar miqdori aniqlanmoqda.