Fargʻona viloyatida ikki hokim jarimaga tortildi
Ular xorijiy investitsiyalarni jalb qilish boʻyicha ishlarda sustkashlikka yoʻl qoʻygan.
Fargʻona viloyati Yozyovon va Bagʻdod tumanlari hokimlariga 30 foiz jarima jazosi qoʻllanildi. Bu haqda viloyat hokimi Xayrullo Bozorovning farmoyishida maʼlum qilingan.
Farmoyish 2025 yil 12 may kuni eʼlon qilindi.
5 may kuni Vazirlar Mahkamasida xorijiy investitsiyalarni oʻzlashtirish boʻyicha 2025 yil uchun belgilangan topshiriqlar ijrosini samarali tashkil etish va navbatdagi ustuvor vazifalar toʻgʻrisida videoselektor yigʻilishi oʻtkazilgan.
Unda bir qator mutasaddi rahbarlar tomonidan joriy yil yanvar-aprel oylari uchun belgilangan rejani bajarmagani, oʻsishni taʼminlamagani va vazifalar ijrosini taʼminlashda yoʻl qoʻygan kamchiliklari jiddiy tanqid qilingan.
Unga koʻra, Bagʻdod, Yozyovon, Oʻzbekiston tumanlarida xorijiy investitsiyalarni jalb qilish boʻyicha tasdiqlangan reja bajarilmaganligi, ushbu hudud mutasaddi rahbarlari yuklatilgan vazifalarni bajarishda qoloqlikka yoʻl qoʻyayotgani koʻrsatib oʻtilgan. Shu sababdan hokimlarga jarima chorasi qoʻllanildi, deyiladi hujjatda.