Janubiy Fargʻona kanali qirgʻogʻida oʻpirilish yuz berdi
Hodisa oqibatida Buloqboshi tumanidagi mahallada joylashgan bir nechta xonadonlarga suv kirgan.
Andijon viloyatining Buloqboshi tumanidan oʻtgan kanal dambasida oʻpirilish roʻy berdi.
Andijon viloyatining Buloqboshi tumani "Sarvontepa" MFY hududidan oqib oʻtuvchi Janubiy Fargʻona kanali qirgʻoqlarining biriga shikast yetganligi natijasida maʼlum miqdorda suv sizib chiqqan.
Ushbu maʼlumot olinishi bilan Viloyat Norin Qoradaryo Irrigatsiya tizimlari boshqarmasi tomonidan suv butkul toʻxtatilgan.
Hozirda Andijon viloyati FVB rahbariyati va kerakli boʻlgan barcha kuch va vositalar sodir boʻlgan hodisani bartaraf etish uchun jalb etilgan va vaziyat toʻliq nazoratga olingan.
Hodisa oqibatida ushbu mahallada joylashgan 560 xonadonlarga suv kirgan. Hozirda Favqulodda vaziyatlar vazirligi va boshqa hamkor tashkilotlarning texnikalari yordamida suv oqimini pasaytirish va kirgan suvlarni chiqarib tashlash ishlari olib borilmoqda.
Vaziyat toʻliq nazoratga olingan, holat yuzasidan qoʻshimcha maʼlumot taqdim etiladi, FVV xabarida.
"Oʻzbekgidroenergo" AJ ham Buloqboshi tumanidan oqib oʻtuvchi Janubiy Fargʻona kanali bosh qismidagi qirgʻoq oʻpirilishi boʻyicha munosabat berdi.
Munosabatga koʻra, kanalda suv sarfi toʻliq toʻxtatilgan. Mazkur tuzilma kuch tuzilmalari oʻpirilib ketgan qirgʻoqda damba tiklash ishlarini amalga oshirayotgani keltirilgan.