Oʻzbekistonda yoz mavsumidek issiq ob-havo kuzatiladi
Dam olish kunlari havo harorati 39 darajagacha koʻtarilishi kutilmoqda.
Oʻzbekistonda dam olish kunlari harorat 39 darajagacha oshadi.
Bugun kunduzi Oʻzbekiston hududining katta qismida quruq ob-havo saqlanib turadi, faqat Fargʻona vodiysida, shuningdek, respublikaning togʻ oldi va togʻli hududlarida baʼzi joylarda qisqa muddatil yomgʻir yogʻishi mumkin.
Havo harorati 29-32 daraja atrofida, janubda va choʻl hududlarda 33-35 darajagacha boʻladi.
Dam olish kunlari respublikaning barcha hududlari boʻyicha yogʻingarchiliksiz ob-havo kuzatiladi.
Havo harorati koʻtarilishi davom etadi, kunduz kunlari havo 33-35 darajagacha, janubda va choʻl hududlarda 37-39 darajagacha isiydi. Bunday harorat may oyining boshiga qaraganda yoz mavsumi uchun koʻproq xosdir.
Shamol sharqdan 7-12 m/s tezlikda esadi, shimolda va choʻl hududlarda baʼzi joylarda 13-18 m/s gacha kuchayishi, ayrim joylarda chang-toʻzonlar bilan kuzatilishi mumkin.
Toshkentda 2-4 may kunlari yogʻingarchilik kutilmaydi. Bugun kunduzi harorat 29-31 daraja, shanba va yakshanba kunlari 32-35 daraja boʻladi.