Tramp maʼmuriyati Oʻzbekistonni boshqalarga namuna qilib koʻrsatdi
AQSh Ichki xavfsizlik vaziri Kristi Noem 131 nafar muhojirning ortga qaytarilishi haqida gapirdi.
Oʻzbekiston tomoni 131 noqonuniy muhojirni ortga qaytardi. Bu AQSh tomonidan olqishlangan.
Qaytarilganlar orasida oʻzbekistonliklardan tashqari, Qozogʻiston va Qirgʻiziston fuqarolari ham bor.
AQSh Ichki xavfsizlik vaziri (DHS) Kristi Noem 131 nafar noqonuniy muhojirni oʻz vataniga qaytarish uchun charter reys tashkil etgani uchun Oʻzbekiston prezidenti Shavkat Mirziyoyevni alohida eʼtirof etgan.
“Xavfsizlikni mustahkamlash va qonun ustuvorligini taʼminlash boʻyicha Oʻzbekiston bilan hamkorlikni davom ettirishni intiqlik bilan kutamiz”, deydi amerikalik amaldor.
Fox News Tramp maʼmuriyatiga tayanib yozishicha, ushbu repatriatsiya bitimi AQShning boshqa davlatlar bilan migratsiya masalalari boʻyicha qanday hamkorlik qilishini koʻrsatib beradigan namuna hisoblanadi. Bitim AQSh Davlat departamenti, Ichki xavfsizlik vazirligi, Oq uy va Milliy xavfsizlik kengashi hamda Oʻzbekiston hukumati oʻrtasida bir necha oy davom etgan diplomatik muzokaralar natijasi sanaladi.