Prokuror va soliqchilar endi sektorlar ishi bilan shugʻullanmaydi
Sektorlar ishiga Bosh vazir oʻrinbosarlari va Oʻzbekiston mahallalari uyushmasi hamda uning hududiy boʻlinmalari masʼul etib belgilanadi.
Endilikda prokurorlar, ichki ishlar xodimlari va soliqchilar sektorlar faoliyati bilan shugʻullanmaydi.
Sektorlar faoliyati yangi tartib asosida yoʻlga qoʻyiladi.
"Korrupsiyaga qarshi kurashish tizimini yanada takomillashtirish boʻyicha belgilangan ustuvor vazifalar ijrosini samarali tashkil etishga doir chora-tadbirlar toʻgʻrisida"gi (PF-71-son, 22.04.2025y.) Prezident farmoni qabul qilindi.
Unga muvofiq, hududlarni kompleks ijtimoiy-iqtisodiy rivojlantirish boʻyicha sektorlar faoliyati yangi tartib asosida yoʻlga qoʻyilishi belgilandi.
Sektorlar ishiga Bosh vazir oʻrinbosarlari va Oʻzbekiston mahallalari uyushmasi hamda uning hududiy boʻlinmalari masʼul etib belgilanadi.
Vazirlar Mahkamasi ikki oy muddatda sektorlarning yangi tartib asosida faoliyat yuritishi boʻyicha Oʻzbekiston prezidenti qarori loyihasini kiritishi kerak.
Prezident 5 mart kuni Korrupsiyaga qarshi kurashish boʻyicha milliy kengash yigʻilishida bundan buyon prokurorlar, ichki ishlar xodimlari va soliqchilar sektorlar faoliyati bilan shugʻullanmasligini maʼlum qilgandi.