AQShning Yamanga hujumi sabab 30 nafar afrikalik halok boʻldi
Ushbu muhojirlar Saudiya Arabistoniga ishlashga oʻtish umidida Yamanga kelgan.
AQSh havo kuchlari Yamandagi husiylarning qarorgohi joylashgan Saʼda viloyatiga hujum qildi.
28 aprel kuni husiylar AQSh hujumi oqibatida qamoqxonada saqlanayotgan kamida 30 nafar afrikalik migrant halok boʻlgani haqida xabar berdi. AQSh armiyasi bu borada hozircha izoh bermadi.
Hujum husiylarning tayanch nuqtasi boʻlgan Yamanning Saʼda viloyatiga uyushtirildi. Oʻn yildan buyon davom etayotgan urushda Efiopiya va boshqa mamlakatlardan boʻlgan afrikalik muhojirlarning oʻldirilishi boʻyicha bu soʻnggi voqea hisoblanadi. Ushbu muhojirlar qoʻshni Saudiya Arabistonida ishlash umidida mamlakatdan oʻtishga harakat qilmoqdalar.
Husiylar bu xabarni eʼlon qilishidan oldin, AQSh Markaziy Qoʻmondonligi oʻzining keng koʻlamli havo hujumlari haqida aniq tafsilotlarni bermaslik qarorini bildirgandi.
"Harbiy harakatlarga oid xabarlarning xavfsizligini taʼminlash maqsadida, olib borilayotgan yoki kelajakda olib borilishi kutilayotgan operatsiyalar haqida maʼlumotlarni oshkor qilmaymiz", — deya bayonot berdi AQSh Markaziy Qoʻmondonligi.
Ular Saʼdadagi daʼvo qilinayotgan hujum boʻyicha Associated Press agentligi savollariga javob bermadi.
Husiylarning al-Masirah yangilik kanalida sunʼiy yoʻldosh yordamida olingan tasvirlarda hududda halok boʻlgan va jarohatlangan kishilarning suratlari namoyish etildi. Al-Masirah muxbiri hududda 100 ga yaqin odam boʻlgani va kamida 30 kishi halok boʻlgani haqida maʼlum qildi.
Efiopiya va Afrikaning boshqa davlatlaridan Yamanga oʻtib, Saudiya Arabistoniga ishlash uchun oʻtmoqchi boʻlgan minglab odamlar harakat qilmoqda. Husiylar esa bu jarayon orqali oʻn minglab dollar daromad olmoqda.
AQSh havo kuchlari Yamanga ikki yoʻnalishdan hujum qilmoqda: biri — Harri Trumen kemasi boshchiligida Qizil dengizdan, ikkinchisi — Karl Vinson kemasi boshchiligida Arabiston dengizidan. 18 aprel kuni Ras Isa yoqilgʻi portiga qilingan hujumda kamida 74 kishi halok boʻlgan, 171 kishi esa jarohat olgan. Bu AQShning eng halokatli hujumlaridan biri sifatida qayd etildi. AQSh Markaziy Qoʻmondonligi 27 aprel kuni bu hujum haqida tushuntirish berdi.
"Amerika Qoʻshma Shtatlari tomonidan amalga oshirilgan hujumlar Ras Isa portining yoqilgʻi qabul qilish imkoniyatini yoʻq qildi. Bu esa husiylarning nafaqat harbiy operatsiyalar, balki terrorchilik faoliyatlari uchun ham millionlab dollar daromad olish imkoniyatlariga taʼsir koʻrsatadi", — deyiladi bayonotda.