Olti yilga qamalgan sobiq kotibiyat mudiri oqlandi
Azatbay Chavdurbayev 2003-2012 yillarda Xorazm viloyati hokimi birinchi oʻrinbosarining kotibiyat mudiri sifatida ishlagan.
Xorazm viloyati hokimi birinchi oʻrinbosarining sobiq kotibiyat mudiri oqlandi.
Xorazm viloyat sudi jinoyat ishlari boʻyicha sudlov hayʼati kassatsiya instansiyasining hukmiga muvofiq 69 yoshli Azatbay Chavdurbayevning huquqlari tiklanib, oqlandi. Bu haqda Oliy sud xabar berdi.
U 2003-2012 yillarda Xorazm viloyati hokimi birinchi oʻrinbosarining kotibiyat mudiri lavozimida ishlagan. 2012 yilda sud hukmi bilan JKning 210-moddasida ayblanib, 6 yillik qamoq jazosiga hukm etilgan.
2024 yilda daʼvo arizasi bilan viloyat sudiga murojaat qilinadi. Uch nafar sudyadan iborat sudlov hayʼati ishni koʻrib chiqqan. Natijada u aybsiz deb topilib, oqlandi.