Xorvatiyada ogʻir tan jarohati olgan oʻzbekistonlik ortga qaytarildi
U oʻtgan yili noyabr oyida YTHga uchragan va Zagreb shahridagi markaziy shifoxonaga yotqizilgan.
Oʻzbekiston elchixonasi xodimlari Xorvatiyada ogʻir tan jarohati olgan yurtdoshimizning vatanga qaytishiga amaliy yordam koʻrsatishdi. Bu haqda "Dunyo" xabar berdi.
Elchixona maʼlumotiga koʻra, N.S. 2024 yilda ishlash uchun Zagreb shahriga kelgan. Oʻtgan yil 29 noyabr kuni u yoʻl transport hodisasi oqibatida ogʻir tan jarohati olgan va Zagreb shahridagi markaziy shifoxonaga yotqizilgan. Bemor oʻtgan vaqt davomida doimiy tarzda shifokorlar nazoratida boʻldi.
Oʻzbekiston elchixonasi voqea sodir boʻlgan dastlabki kunlardanoq vaziyatni nazoratga oldi. Diplomatik missiya shifokorlar va shifoxona vakillari bilan hamyurtimizning ahvoli yuzasidan muloqot qilib turdi. Jabrlanuvchining oila aʼzolari bilan ham yaqin muloqot oʻrnatildi va bemorning ahvoli toʻgʻrisida aniq maʼlumotlar taqdim etildi.
Bemorning murakkab ahvoli inobatga olinib, diplomatik vakolatxona tashabbusi bilan, Migratsiya agentligi va Oʻzbekiston Sogʻliqni saqlash vazirligi koʻmagida yuqori malakali tibbiyot mutaxassisi Xorvatiyaga olib kelindi.
Barcha jalb qilingan tuzilmalarning muvofiqlashtirilgan saʼy-harakatlari tufayli N.S. 11 aprel kuni Oʻzbekistonga muvaffaqiyatli yetkazildi. Vatanga yetib kelgach, u ixtisoslashtirilgan tibbiyot muassasasiga joylashtirilgan va kerakli davolanishni davom ettirmoqda.
Bemorning davolanishi uchun ketgan toʻlovlar sugʻurta kompaniyasi va ish beruvchi tomonidan qoplangan.