Masjid portlashi qurbonlari soni yana bittaga koʻpaydi
Muftiy andijonlik imom-xatiblar bilan tezkor yigʻilish oʻtkazdi.
Izboskan tumanidagi masjid portlashida halok boʻlganlar soni 4 kishiga yetdi. Bu haqda Platina.uz manbasi xabar berdi.
Maʼlum boʻlishicha, toʻrtinchi jasad kecha kechqurun vayronalar orasidan chiqarib olingan.
Bugun Oʻzbekiston musulmonlari idorasi raisi, muftiy Shayx Nuriddin Xoliqnazar Andijon viloyatidagi tuman-shahar bosh imom-xatiblarining masjidlarda xavfsizlik texnikasiga rioya qilishga bagʻishlangan tezkor yigʻilish oʻtkazdi.
Yigʻilishda Izboskan tumanidagi masjid tahoratxonasida boʻlgani kabi baxtsiz hodisalarning oldini olish, masjid maʼmuriyatining masʼuliyatini oshirish, har bir obʼekt va texnik xizmat koʻrsatish qurilmalariga alohida javobgar shaxs tayinlash yuzasidan koʻrsatmalar berdi.
Eslatib oʻtish kerak, kecha Ahmadali Hoji jomeʼ masjidida gaz portlagan. Oqibatda 3 kishi halok boʻlgan, 10 kishi jarohatlangan.
Ushbu hodisa boʻyicha jinoiy ish ochilgan.