Izboskandagi portlashda 3 kishi halok boʻldi
Oʻn kishi esa turli jarohatlar bilan shifoxonaga yotqizilgan.
Izboskan tumanida sodir boʻlgan holat yuzasidan qoʻshimcha maʼlumot berildi. Portlash sabab 3 kishi halok boʻlgan.
Bugun, 31 mart kuni soat 12:19 da Andijon viloyati, Izboskan tumani “Mirzo Ulugʻbek” MFY, Yangibozor koʻchasida joylashgan masjid hududidagi tahoratxonada gaz-havo aralashmasining chaqnashi sodir boʻlganligi toʻgʻrisida Andijon viloyati FVBGA xabar qilingan.
Zudlik bildan aytilgan manzilga 2 ta qutqaruv otryadi va 2 ta yongʻin-qutqaruv ekipaji yetib borgan. Hodisa natijasida tahoratxona devor va tom konstruksiyalariga zarar yetgan, yongʻin sodir boʻlmagan.
Chaqnash oqibatida 3 nafar fuqaro halok boʻlgan, 10 nafar fuqaro tan-jarohati olib, shifoxonaga yuborilgan.
Voqea joyiga viloyat hokimi, FVB, IIB, MG, SSB, prokuratura va “Hududgaztaʼminot”, tuman FVDQT xizmatlari kuch, vositalari yetib borib, hodisa oqibatlari bartaraf etilmoqda.
Hodisa sodir boʻlganligi xabar qilinganida vodiyda boʻlib turgan Bosh vazir oʻrinbosari O.Ramatov hamda Favqulodda vaziyatlar vaziri general-mayor B.Qudratxoʻjayev Izboskan tumaniga yetib borgan.
Hozirda mazkur holat yuzasidan dastlabki tergovoldi surishtiruv ishlari olib borilmoqda.
