Shavkat Mirziyoyev Tojikistonga boradi
U yerda Oʻzbekiston, Tojikiston va Qirgʻiziston davlat chegaralarining tutash nuqtasi toʻgʻrisidagi shartnoma imzolanadi.
Oʻzbekiston Prezidenti Shavkat Mirziyoyev Tojikiston Prezidenti Imomali Rahmonning taklifiga binoan 31 mart kuni amaliy tashrif bilan Xoʻjand shahrida boʻladi.
Tashrif dasturiga muvofiq, Oʻzbekiston, Tojikiston va Qirgʻiziston yetakchilarining qoʻshma uchrashuvi hamda ikki tomonlama muzokaralar oʻtkazilishi rejalashtirilgan.
Kun tartibidan mamlakatlar oʻrtasidagi doʻstlik, yaxshi qoʻshnichilik va strategik sheriklik munosabatlarini yanada mustahkamlash, savdo-iqtisodiy va madaniy-gumanitar hamkorlikni kengaytirish masalalari oʻrin olgan.
Tadbir yakunida Oʻzbekiston, Tojikiston va Qirgʻiziston davlat chegaralarining tutash nuqtasi toʻgʻrisidagi shartnomani imzolash koʻzda tutilgan.
Davlat rahbarlari sanʼat ustalarining qoʻshma konsertida ham ishtirok etadilar.
