Shavkat Mirziyoyev Qozogʻistonga amaliy tashrif bilan bordi
Uni aeroportda Qosim-Joʻmart Toʻqayev kutib oldi. Ular savdo, sanoat kooperatsiyasi, transport va logistika, energetika va boshqa masalalarda muzokaralar oʻtkazadilar.
Oʻzbekiston Respublikasi Prezidenti Shavkat Mirziyoyev amaliy tashrif bilan Olmaota shahriga keldi.
Davlatimiz rahbarini Qozogʻiston Respublikasi Prezidenti Qosim-Joʻmart Toʻqayev kutib oldi. Oʻzbekiston yetakchisi sharafiga faxriy qorovul saflandi va ikki mamlakat bayroqlari koʻtarildi.
Bugun Oʻzbekiston va Qozogʻiston Prezidentlari norasmiy uchrashuv oʻtkazadilar. Kun tartibidan savdo, sanoat kooperatsiyasi, transport va logistika, energetika, qishloq va suv xoʻjaligi sohalarida amaliy hamkorlikni kengaytirish, shuningdek, hududlar oʻrtasidagi faol aloqalar va madaniy-gumanitar almashinuvni davom ettirish masalalari oʻrin olgan.
Davlat rahbarlari xalqaro siyosat va mintaqaviy hamkorlik masalalari yuzasidan ham fikr almashadilar.
