Sartaroshlar, repititor, gidlar va boshqalar oʻzini oʻzi band qiluvchilar roʻyxatidan chiqarilmoqda

Endilikda sartaroshlik, repititorlik, foto va video xizmatlari koʻrsatish oʻzini oʻzi band qilishga kirmaydi.

Prezidentning “Kichik va oʻrta biznesning iqtisodiyotdagi oʻrnini oshirish chora-tadbirlari toʻgʻrisida”gi farmoni eʼlon qilindi.

Unga koʻra oʻzini oʻzi band qilgan shaxslar shugʻullanishi mumkin boʻlgan faoliyat turlari, ishlar va xizmatlarning yangi roʻyxati tasdiqlandi. Mazkur roʻyxatga hozirda 104 ta band kiritilgan boʻlsa, 2026 yil 1 yanvardan boshlab u 72 taga qisqaradi. Sartaroshlik, repetitorlik, foto-videochilik, kopirayterlik, uyda eshik va derazalar yasash, gulchilik, gazeta va jurnallar sotish, dehqon bozorlarida qishloq xoʻjaligi mahsulotlari bilan savdo qilish va boshqalar (toʻliq ilovada) roʻyxatdan chiqarib tashlanadi. Ushbu kasblar vakillari yakka tartibdagi tadbirkor yoki yuridik shaxs sifatida roʻyxatdan oʻtishlari kerak.

Yangi roʻyxatga elektron savdo maydonchalarida (marketpleyslarda) tovar va xizmatlarning chakana savdosi, shuningdek, nomoddiy madaniy meros obʼektlarini muhofaza qilish va ulardan foydalanish hamda parrandachilik ham kiritilgan.

Farmonga koʻra, 2025 yilda kichik va oʻrta biznesni rivojlantirishning asosiy maqsadli koʻrsatkichlari etib quyidagilar belgilandi, jumladan:

-kichik va oʻrta biznesning yalpi ichki mahsulotdagi ulushini 55 foizga, sanoatda – 34 foizga, eksportda – 34 foizga va aholi bandligini taʼminlashda 75 – foizga yetkazish;

-kamida 600 nafar kichik va oʻrta biznes subʼektlarining yiriklashishiga koʻmaklashish orqali ularni “chempion” tadbirkorlarga aylantirish;

-100 nafardan koʻp ishchisi bor tadbirkorlik subʼektlari sonini 4 mingga yetkazish.

2025 yil 1 maydan:

-oʻzini oʻzi band qilgan shaxslar YaTT yoki yuridik shaxs sifatida davlat roʻyxatidan oʻtkazilganda, davlat boji undirilmaydi;

-oʻz faoliyatini tegishincha YaTT, mikrofirma yoki kichik korxona toifasigacha yiriklashtirgan oʻzini oʻzi band qilgan shaxslar va tadbirkorlarga Oilaviy tadbirkorlikni rivojlantirish dasturi doirasida 50 million soʻmgacha, Kichik biznesni uzluksiz qoʻllab-quvvatlash kompleks dasturi doirasida – 150 million soʻmgacha garovsiz kreditlar beriladi;

-oʻz faoliyatini tegishincha oʻrta yoki yirik biznes toifasigacha yiriklashtirgan tadbirkorlarga – 1 yil davomida QQS summasi oʻrnini qoplash (qaytarish) 7 kun muddatda tezlashtirilgan tartibda amalga oshiriladi.