Ulugʻbek Joʻrayev Andijon viloyati hokimi oʻrinbosari vazifasini bajaruvchi etib tayinlandi
Bungacha u hokimlikda kotibiyat mudiri lavozimida ishlab kelayotgan edi.
Andijon viloyati hokimiga yangi oʻrinbosar tayinlandi.
Joʻrayev Ulugʻbek Shuhratjon oʻgʻli Andijon viloyat hokimining qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari vazifasini bajaruvchisi etib tayinlandi.
U 1990 yilda Andijon tumanida tugʻilgan. Andijon qishloq xoʻjaligi institutini tamomlagan.
Mehnat faoliyatini 2015 yilda Andijon shahar moliya boʻlimida xoʻjalik ishlari mudiri sifatida boshlagan.
2016-2020 yillarda Andijon tumani hokimligi moliya boʻlimining byudjet boʻlimi boshligʻi oʻrinbosari hamda boʻlim boshligʻi, 2022-2023 yillarda Monopoliyaga qarshi kurashish qoʻmitasining Andijon viloyat hududiy boshqarmasi boshligʻi, Raqobatni rivojlantirish va isteʼmolchilar huquqlarini himoya qilish qoʻmitasining Andijon viloyat hududiy boshqarmasi boshligʻi lavozimlarida faoliyat olib borgan.
Ushbu tayinlovga qadar Andijon viloyat hokimligining qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha kotibiyat mudiri lavozimida ishlab kelayotgan edi.
