Namanganda jamoat transporti narxlari oshirildi
Avtobusda naqd toʻlov bir kishi uchun 3 ming soʻmni tashkil etadi.
Namangan viloyatida jamoat transportida yoʻlkira oshmoqda. Bu haqda hokim Shavkat Abdurazzoqovning 24 mart kuni chiqqan qarorida aytib oʻtilgan.
Unga koʻra, avtobusda naqd toʻlov bir kishi uchun 3 ming soʻmni tashkil etadi. Kartalar orqali elektron toʻlov qilinganda bu miqdor 2300 soʻmni tashkil etishi belgilangan.
Bir yoʻlovchining bagajini tashish bilan bogʻliq xarajatlar 3 ming soʻm, ogʻirligi 20 kgdan oshiq yuklar uchun ham 3 ming soʻm toʻlov undiriladi. Shahar transportida 7 yoshgacha boʻlgan bolalardan toʻlov olinmaydi.
Shahar atrofi va viloyat ichi aro yoʻnalishlarda bir kilometr uchun 260 soʻm, yoʻnalishli taksilarda 410 soʻm narx belgilandi.
Qaror eʼlon qilingan kun (24 mart)dan kuchga kirishi belgilangan.
Jamoat transporti tarif rejalari bir kunlik tarif 7 ming soʻm, bir oylik 200 202 soʻm, bir yillik 1 mln 642 ming soʻmni tashkil etadi.
Bu narx oʻquvchilar uchun kunlik 4 ming soʻm boʻlsa, oylik miqdor 100 ming soʻm, yillik miqdor esa 912 ming soʻmni tashkil etadi.