Tramp Eronga ikki oy muhlat berdi
AQSh prezidenti Erondan yangi yadroviy kelishuv boʻyicha muzokaralar olib borishni talab qilgan va taklif rad etilsa oqibatlari haqida ogohlantirgan.
Prezident Donald Tramp Eronga AQSh bilan yangi yadroviy kelishuvga erishish uchun ikki oy vaqt berdi.
Bu haqda AQSh prezidentining oʻtgan hafta Eron oliy rahnamosi Oyatulloh Ali Xomanaiyga yuborgan maktubida aytilgan, deya xabar beradi Axios amerikalik rasmiylar va yana ikki manbaga asoslanib.
Nashrning yozishicha, Donald Trampning maktubi tahdidli boʻlgan. Unda AQSh prezidenti yangi yadroviy kelishuv boʻyicha muzokaralar olib borishni talab qilgan va uning taklifi rad etilsa, oqibatlari haqida ogohlantirgan.
Axios taʼkidlaganidek, maktubda Tramp ochiq muzokaralarni istamasligini aytdi va bitim tuzish uchun ikki oylik muddatni koʻrsatdi. Xabarda bu maktub olinganidan keyin yoki muzokaralar boshlanganidan keyingi vaqtga tegishli ekanligi aniq emas.
Nashr manbalariga koʻra, Oq uy maktub mazmuni haqida AQShning bir qancha ittifoqchilari: Isroil, Saudiya Arabistoni va BAAni xabardor qilgan.
Oq uy va Eronning BMTdagi missiyasi bu maʼlumotga izoh berishdan bosh tortdi, deb yozadi jurnalistlar.
Donald Tramp yanvar oyida Oq uyga qaytganidan beri Tehron bilan yangi yadroviy kelishuvga intilyapti. 12 mart kuni Ali Xomanaiy maktubni olganidan keyin Trampning muzokaralar taklifini “aldash” deb atadi.
