Yirik tashkilotlarning xorijiy avtomobillari sotuvga qoʻyilmoqda
Prezident administratsiyasi transport qismi balansida boʻlgan CADILLAC, “Agroinspeksiya” balansidagi Toyota Land Cruiser avtomobili auksionga chiqarilgan.
Oʻzbekistonda yirik davlat tashkilotlarining xorijiy avtomobillari auksionda sotila boshladi.
Masalan, E-auksion orqali Prezident administratsiyasi transport qismi balansida boʻlgan CADILLAC avtomobili 246 mln soʻm boshlangʻich narx bilan savdoga chiqarilgan. Savdo 2025 yil 25 mart kuni oʻtkaziladi.
Oʻzbekiston Prezidenti administratsiyasi Transport qismi savdoga qoʻyilayotgan avtotransport vositalariga nisbatan taqiq va jarimalar yoʻqligini bildiruvchi kafolat xatini imzolagan.
CADILLAC avtomobili bilan birga boshqa vositalar, jumladan Mercedez Benz 350 S W221 ham sotuvga qoʻyilgan. Uning qayta belgilangan narxi 245 mln soʻmni tashkil etadi.
“Agroinspeksiya” balansidagi Toyota Land Cruiser avtomobili qariyb 471 mln soʻm boshlangʻich narx bilan savdoga chiqarilgan.
Tashkilot masʼullari chindan ham mazkur avtomobil sotilayotganini tasdiqlagan, istagan odam uni sotib olishi mumkin. Savdo 14 aprel kuni oʻtkazilishi belgilangan.
Eslatib oʻtamiz, avvalroq bosh vazir Abdulla Aripov davlat rahbari topshirigʻidan keyin Malibu avtomobilidan foydalanayotgani maʼlum boʻlgandi.