Ortga qadam: tezlik chegarasi 10 km.gacha oshirilishi kutilyapti
2023 yilda soatiga 70 km harakatlanish oʻrniga 60 km/s etib belgilangandi. Endi mantiqan yana shuni 70 km/s qilib tenglashtirishmoqchi.
Hukumat radarlar qayd etgan koʻrsatkichdan chegirib tashlanadigan 5 km/soat tezlikni 10 km/soatgacha oshirish haqidagi qonun loyihasini parlamentga kiritgan.
“Qonun loyihasi orqali tezlik bilan bogʻliq qoidabuzarliklar boʻyicha radar va spidometrlar koʻrsatkichlari xatolaridan kelib chiqib, qayd etilgan tezlikdan 10 km/soat chegirib tashlangan holda maʼmuriy jazo qoʻllanilishi nazarda tutilmoqda”, – deyilgan qonunchilik palatasi axborotida.
Bu qonun qabul qilinib, kuchga kirsa, tezlik 60 km/soat bilan cheklangan joyda haydovchilarga 65 km/soat tezlik emas, 70 km/soat tezlikdan boshlab jarima qoʻllaniladi.
Eslatib oʻtish kerak, 2023 yildan shaharlar hududida yengil mashinalarning maksimal tezligi 70 km/soatdan 60 km/soatga tushirilgandi. Bu yangilikdan keyin kamera oʻrnatilgan joylarda YTHlar sezilarli kamaygan.
Har yili 2200 dan ortiq odam YTH qurboni boʻladi. Yana minglab odamlar avtohalokat tufayli mayib-majruh boʻlib qolmoqda.