Shahrisabz aeroporti vaqtincha yopiladi
Aeroport uchish-qoʻnish yoʻlagida kapital taʼmirlash ishlari olib boriladi.
Shahrisabz aeroporti vaqtincha yopiladi.
2025 yil 13 mart Toshkent vaqti bilan soat 05:00 dan 2025 yil 25 mart 05:00 gacha Shahrisabz aeroporti uchish-qoʻnish yoʻlagida kapital taʼmirlash ishlari boshlanishi munosabati bilan oʻz faoliyatini vaqtincha toʻxtatadi. Bu haqda Uzbekistan Airports xabar berdi.
Uchish-qoʻnish yoʻlagining uzoq muddat - 1983 yildan beri ishlatilishi munosabati bilan hamda havo kemalarining qoʻnishi va uchishi xavfsizligini taʼminlash maqsadida keng kapital qurilish va taʼmirlash ishlari olib boriladi.
Xususan, 1554 m uzunlikdagi uchish-qoʻnish yoʻlagi yuzasini almashtirish va mustahkamlash rejalashtirilgan.
Shuningdek, yurish yoʻlagining ustki qatlami ham taʼmirlanadi.
Tanlov natijalariga koʻra, qurilish-taʼmirlash ishlarini “Fargʻona yoʻllardan muntazam foydalanish korxonasi” olib boradi.
Shu paytgacha Shahrisabz aeroportida samolyotlarni qabul qilish imkoniyati cheklangan edi – parvozlar haftasiga ikki marta kichik L-410 samolyotlarida amalga oshirilardi.
Uchish-qoʻnish yoʻlagi taʼmirlangandan soʻng aeroport oʻrta masofaga moʻljallangan zamonaviy ATR-72 samolyotlarini haftasiga uch martagacha qabul qilish imkoniyatiga ega boʻladi.