Samarqanddagi tarixiy inshootlarga 46,8 mlrd soʻmlik zarar yetkazildi
XIX – XX asrlarga oid 3 ta tarixiy masjid buzib tashlangan.
Samarqanddagi tarixiy masjidlarga 46,8 mlrd soʻmlik zarar yetkazildi.
Prokuratura organlari tomonidan Madaniy meros agentligi bilan hamkorlikda nazorat tadbirlari oʻtkazilgan.
Tadbir davomida Samarqand viloyatidagi XIX – XX asrlarga oid 3 ta tarixiy masjid binolari buzib tashlanganligi hamda 1 tasi tegishli ruxsatsiz taʼmirlanganligi oqibatida yodgorliklarga jami 46,8 mlrd soʻmlik zarar yetkazilganligi aniqlandi.
Xususan, Kattaqoʻrgʻon tumanidagi “Kushoq ota” masjidi buzilgan, yodgorlikka 19,6 mlrd zarar keltirilgan.
Urgutdagi “Ahmad Yassaviy” va “Hoji Oʻrinboy” masjidlari buzilib, 17 mlrd soʻmlik zarar yetkazilgan.
Shuningdek, Samarqand tumanidagi “Kulba” arxitektura yodgorligi ruxsatsiz taʼmirlanganligi natijasida 10,2 mlrd soʻmlik zarar yetkazilgan.
Aniqlangan holatlar yuzasidan jinoyat ishlari qoʻzgʻatilib, nazorat tadbirlari davom ettirilmoqda.