"Qamchiq" dovonida minglab odamlar qorda qolib ketdi
Ular uchun Angren - Qoʻqon yoʻnalishida vaqtincha bepul poyezd harakati yoʻlga qoʻyildi.
Bugun ertalabdan yoqqan kuchli qor tufayli "Qamchiq" dovoni yopildi, minglab odamlar qorda qolib ketdi.
Favqulodda vaziyatlar vazirligi xodimlari noqulay ahvolga tushib qolgan haydovchilarga yordam koʻrsatmoqda. Yoʻlovchilar uchun FVV tomonidan isinish maskanlari tashkil etilgan.
Favqulodda vaziyatlar vazirining birinchi oʻrinbosari jarayonni muvofiqlashtirib borayotgani aytilgan. Shuningdek, Angren shahrida joylashgan 19 ta oshxona, 4 ta mehmonxonaga 790 nafar erkak, 130 nafar ayol va 38 nafar bolalar vaqtincha joylashtirilgan.
Ayni vaqtda "Qamchiq" dovonida qor yogʻishda davom etmoqda. FVV, YPX va "Qamchiqavtoyoʻl" IYFUK xodimlari hamkorligida yoʻlni qordan tozalash, muzlamalar hosil boʻlishining oldini olish va qum-tuz aralashmasini sepish ishlari olib borilmoqda.
Shuningdek, FVV qutqaruvchilari tomonidan nazorat tadbirlari olib borilib, yoʻlda qolib ketgan haydovchi va ularning avtotransport vositalariga yordam koʻrsatilmoqda.
Qorda qolib ketgan odamlar uchun Angren - Qoʻqon yoʻnalishida vaqtincha bepul poyezd harakati ham yoʻlga qoʻyildi.