Prezident sudlar faoliyatiga aralashishni jiddiy qoraladi
Qonunchilikda korrupsiyaviy jinoyatlarning aniq roʻyxati yoʻqligiga eʼtibor qaratildi.
Davlatimiz rahbari sud tizimida korrupsiyaviy xavf-xatarlarni oldini olish, odil sudlov sifati va samaradorligini oshirish doimo diqqat markazida boʻlishi zarurligini taʼkidladi.
Soʻnggi yillarda sudlar mustaqilligini taʼminlash boʻyicha katta islohotlar amalga oshirildi. Lekin sudyalarni majlisga chaqirish, ularga vakolatiga kirmaydigan vazifalarni yuklash holatlari ham uchrab turgani qayd etildi.
Shuningdek, ayrim idoralar tomonidan sudga taʼsir oʻtkazishga urinishlar hali-hanuz davom etayotgani koʻrsatib oʻtildi.
“Barcha rahbarlarni qatʼiy ogohlantiraman. Sudlar faoliyatiga har qanday aralashish odil sudlovga soya solish, deb baholanadi. Bu boʻyicha soʻrov ham, javobgarlik ham qattiq boʻladi”,- dedi Prezident.
Odil sudlovni amalga oshirishda advokatlar oʻrni juda muhim. Bu borada advokatlarga himoyasidagi fuqaroga oʻz vaqtida huquqiy yordam koʻrsata olishlari uchun imkoniyat yaratish kerakligi qayd etildi.
Mutasaddilarga uch oy ichida sifatli yuridik yordam koʻrsatilishida advokatlar faoliyatiga toʻsqinlik qilayotgan omillarni bartaraf etish boʻyicha qonun loyihasini kiritish topshirildi.
Hozirda qonunchilikda korrupsiyaviy jinoyatlarning aniq roʻyxati yoʻqligiga eʼtibor qaratildi.
Parlament tasdiqlagan qonunda asosan jazoni kuchaytirishni oʻzi bilan cheklanib qolingani, korrupsiyani oldini olish, odamlarimizni bunga toqatsizlik ruhida tarbiyalash, profilaktika mexanizmlarini yaratish, jinoyatni fosh etishga yordam berganlarni ragʻbatlantirish kabi masalalar aks etmagani koʻrsatib oʻtildi.
Shuning uchun Prezident bu qonunni qayta ishlash uchun qaytarishini aytdi.
Shu bilan birga jinoiy daromadlarni legallashtirish bilan bogʻliq jinoyatlar uchun javobgarlikni ham xalqaro standartlarga moslashtirish lozimligi qayd etildi.
Misol uchun, Shveysariya, Avstriya, Germaniya, Rossiya, Ozarbayjon qonunchiligida davlat xaridlari va yirik biznes loyihalar parametrlarini oldindan sizdirib (insayderlik), daromad olganlik ham jinoiy daromadlarni legallashtirish, deb baholanadi.