Jarima ballari sabab "prava"sidan ayrilgan haydovchilar qayta imtihon topshiradi

Haydovchilik huquqini toʻxtatib turish muddati tugagandan soʻng, uni faqat yoʻl harakati qoidalari imtihonini muvaffaqiyatli topshirgandan keyingina qayta olish mumkin boʻladi. Bu haqda "Gazeta.uz" maʼlum qildi.

Shu tariqa huquqbuzarlar yana mashina boshqarishga ruxsat olishdan oldin oʻz malakasini isbotlashi kerak boʻladi.

Oʻzbekistonda yoʻl harakati qoidalarini buzgan haydovchilarga jarima balli tizimi joriy etilmoqda. Bu prezident 20 fevral kuni imzolagan qonunda koʻzda tutilgan.

Oʻzgartirishlarga koʻra, qoidabuzarlik uchun asosiy jazodan tashqari, haydovchilarga jarima ballari ham beriladi. Bitta qoidabuzarlik uchun maksimal ball soni ikkitadan oshmasligi kerak.

Jarima ballari birinchi qoidabuzarlik sodir etilgan kundan boshlab bir yil davomida toʻplanadi. Agar haydovchi bir yil ichida 12 dan ortiq ball toʻplasa, u avtomatik ravishda haydovchilik guvohnomasidan mahrum boʻladi. Cheklov muddati 6 oydan kam boʻlishi mumkin emas.

Ushbu va boshqa oʻzgartirishlar Vazirlar mahkamasining bir oy muddatda ishlab chiqilishi va qabul qilinishi koʻzda tutilgan qaroriga kiritilishi rejalashtirilgan. Unda jarima ballarini hisoblash tartibi va miqdori belgilanadi.

2022 yil 4 fevraldan Toshkent shahrining Sergeli tumanida Autodriver Study kompaniyasining haydovchilik guvohnomasini olish uchun imtihon topshirish Yagona imtihon markazi ish boshlagandi. Xuddi shu kundan boshlab poytaxt IIB YHXBning barcha roʻyxatga olish va imtihon boʻlimlari nazariy va amaliy imtihonlarni qabul qilishni toʻxtatgan.

Keyinroq kompaniya Jizzax, Sirdaryo, Qashqadaryo, Namanagan, Andijon, Fargʻona, Toshkent va Samarqand viloyatlarida ham imtihon markazlarini ochdi.

Ayni paytda Toshkent imtihon markazida imtihon topshirish uchun birinchi urinish narxi nazariy imtihon uchun ham, amaliy imtihon uchun ham 1 million soʻmni tashkil etadi. Agar birinchisida muvaffaqiyatsizlikka uchralsa, keyingi urinishlar 1,2 million soʻmga tushadi. Shu tarzda uch yil ichida toʻlov narxi oʻn barobar oshdi.

Autodriver Study asoschisi Gid Systems Tashkent hisoblanadi. Oʻz navbatida, ushbu kompaniya GID FZE (76%) va ITS Holding LLC’ga (24%) tegishli. Ilgari GID FZE korxonaning 100 foiziga egalik qilgan. Xuddi shu taʼsischilar GID License Plate kompaniyasiga ham xuddi shunday nisbatda egalik qiladi (avtoraqam ishlab chiqarishga aloqador, 2024 yilda u Oʻzbekistonning top-20 soliq toʻlovchilari qatoriga kirgandi).

GID FZE, shuningdek, maktab darsliklarini nashr etish uchun masʼul boʻlgan Novda Edutainment nashriyotiga ham egalik qiladi.