Navoiyda infratuzilma va aholi turmushini yaxshilash uchun 25,5 mlrd soʻm ajratiladi
Viloyat harbiy-maʼmuriy sektorini rivojlantirishga 2,5 mlrd soʻm, koʻpqavatli uylardagi elektr tarmoqlarini taʼmirlashga salkam 1 mlrd soʻm beriladi.
Xalq deputatlari Navoiy viloyati kengashi qarori bilan mahalliy byudjetdan 25,5 mlrd soʻm ajratilishi belgilandi.
Mablagʻlar ifratuzilma xarajatlari, aholi turmush darajasini yaxshilash, hududlarni ijtimoiy-iqtisodiy rivojlantirishga yoʻnaltiriladi.
Qaror ilovasida xarajatlar jadvali keltirilgan. Jumladan, 2,5 mlrd soʻm mablagʻ viloyat harbiy-maʼmuriy sektorini rivojlantirish jamgʻarmasiga taqdim etiladi, viloyat hokimligi maʼmuriy binosi xarajatlari uchun 2,4 mlrd soʻm, xalqaro turizm yarmarkalari va koʻrgazmalari uchun 1 mlrd soʻm beriladi.
Hududiy futbol assosiatsiyalarini qoʻllab-quvvatlashga 183 mln soʻm, koʻpqavatli uylardagi elektr tarmoqlari(shit)ni taʼmirlash uchun 944 mln soʻm, Xatirchi tumanidagi 49-maktabga 45 mln soʻm, Navbahor tumanidagi kasb-hunar maktabini rekonstruksiya qilish xarajatlari uchun 1 mlrd soʻm ajratiladi.
Navoiy shahridagi 10-maktabni mukammal taʼmirlashga 699 mln soʻm, Nurotadagi tugʻruqxonani taʼmirlashga 95 mln soʻm, viloyat televideniyesini rekonstruksiya qilish uchun 500 mln soʻm ajratilishi koʻzda tutilgan.
Navoiy shahrida kutubxona qurishga 1 mlrd soʻm beriladi. Xatirchida xotira xiyoboni qurishga 500 mln soʻm ketishi belgilangan.
Viloyat hokimligiga kechiktirib boʻlmaydigan va favqulodda xarajatlar uchun 7 mlrd soʻm pul yoʻnaltiriladi.