Rossiya va AQSh delegatsiyasi Saudiyada muzokara oʻtkazadi
Jarayon 18 fevral kuni boʻlib oʻtishi kutilyapti. Unda AQSh davlat kotibi va Rossiya TIV rahbari qatnashishi aytilmoqda.
18 fevral kuni Saudiya Arabistonida Rossiya va AQSh delegatsiyalarining uchrashuvi boʻlib oʻtadi, deya xabar bermoqda Amerika va Rossiya OAVlari.
Bu haqda Axios portali (ikkita manbaga tayangan holda) va "Kommersant" gazetasi xabar berdi.
Uchrashuvda Amerika tomonidan Davlat kotibi Marko Rubio, milliy xavfsizlik boʻyicha maslahatchi Maykl Uols va Yaqin Sharq boʻyicha maxsus elchi Stiv Vitkoff ishtirok etishi kutilmoqda.
Vitkoff avvalroq Fox News telekanaliga Uols bilan yakshanba kuni kechqurun Saudiya Arabistoniga borishini aytgan edi. Rubio u yerga dushanba kuni Isroildan keladi.
Rossiya delegatsiyasiga kim rahbarlik qilishi rasman eʼlon qilinmagan, biroq OAV manbalari bu Rossiya tashqi ishlar vaziri Sergey Lavrov boʻlishi mumkinligini yozmoqda.
Muzokaralarda Rossiya prezidenti yordamchisi Yuriy Ushakov va Tashqi razvedka xizmati direktori Sergey Narishkin ham ishtirok etishi mumkin.