Toshkentdagi supermarketlarda sabzavot narxlari pasaya boshladi
Kartoshka narxi oshganidan keyin Pokistondan kartoshka import qilindi va bu narx pasayishiga olib keldi.
2025 yilning fevral oyida Toshkent shahridagi yirik supermarketlarda 21 nomdagi oziq-ovqat mahsulotlari narxining oʻzgarishi koʻrib chiqildi.
Monitoring natijalari 6 nomdagi mahsulot boʻyicha minimal narxlar oʻtgan oydagiga nisbatan pasayganini koʻrsatdi. Tahlil 2025 yil 9 yanvar va 6 fevral orasida oʻtkazilgan monitoring maʼlumotlari asosida amalga oshirildi.
Shunday qilib, kartoshkaning minimal narxi 26,1 foiz, qizil sabziniki 11,3 foiz, lavlaginiki 8,2 foiz, tuxumniki 7,8 foiz, sutniki 0,9 foiz, shakarniki 0,4 foiz pasaygan. Oʻtgan oyda kartoshka narxi oshganidan keyin Pokistondan kartoshka import qilindi va bu narx pasayishiga olib keldi.
8 nomdagi mahsulot boʻyicha minimal narxlar oshgan. Ayniqsa, oqbosh karam narxida eng katta oʻsish qayd etildi. Bu mavsumiy omil bilan bogʻliq.
Bodring narxi ham sezilarli darajada oshgan, ammo oʻtgan yilning shu davridagiga nisbatan 30 foiz arzon.
7 nomdagi mahsulotning eng past narxlari oʻzgarishsiz qolgan. Bular – bugʻdoy uni, guruch, grechka, makaron, olma, banan, tovuq goʻshti (file).
