Jizzax va Samarqanddagi maktablarga ham avtobus qoʻyilishi boshlanadi
Bu haqda Transport vaziri Ilhom Mahkamov Qonunchilik palatasi yigʻilishida maʼlum qildi.
Joriy yil yana ikki viloyatning olis hududlaridagi maktab oʻquvchilari uchun avtobus qoʻyish boshlanadi.
Oliy Majlis Qonunchilik palatasi yigʻilishida deputatlar maktab oʻquvchilari uchun avtobuslar qoʻyish tajribasi masalasini koʻtardi.
Transport vaziri Ilhom Mahkamovga koʻra, maktablarga avtobuslar qoʻyish ijobiy natija bermoqda.
Hozirgacha Qashqadaryo viloyatida 50 ta, Surxondaryo viloyatida ham 50 ta maktabda avtobus qatnovlari yoʻlga qoʻyilgan.
Tumanlar moliya boʻlimlari bilan hamkorlikda tashuv tariflari va parametrlari belgilangan. Qashqadaryo va Surxondaryodagi maktablar yoʻnalishlari chizilib, birjaga qoʻyilgan. Ayrim holatlarda yoʻllarning ahvoli boʻyicha muammolar ham koʻzga tashlangan.
Tajriba 2025 yilda Samarqand va Jizzax viloyatlarida amalga oshiriladi. Ilhom Mahkamovning maʼlum qilishicha, tajriba tez orada boshqa hududlarni ham qamrab oladi.
Eslatib oʻtamiz, 2023 yil yozida Shavkat Mirziyoyev prezidentlikka nomzod sifatida Nukusda saylovchilar bilan uchrashuvda maktablarga avtobuslar qoʻyilishi haqida gapirgandi.