Aktyor Husan Musaboyev vafot etdi
U "Bozor koʻrmagan yigit" videospektakli, "Ajoyib xayolparast", "Aldamadim, hazillashdim", "Ana xolos", "Dadam bilmasin", "Qora tanli bojalar", "Bebahoginam" va boshqa filmlarda rol ijro etgan.
Aktyor va teatr arbobi Husan Musaboyev 71 yoshida vafot etdi.
Oʻzbekistonda xizmat koʻrsatgan artist Husan Musaboyev "Televizion miniatyuralar teatri"dagi komedik rollari bilan tomoshabinlar koʻnglidan joy olgandi.
Husan Qosimovich Musaboyev 1954 yilning 10 iyun kuni Toshkent shahrida tavallud topgan. 1976 yilda Toshkent teatr va rassomlik sanʼati institutini "Kino va teatr aktyori" boʻlimini tugatgan.
Ish faoliyatini 1971 yil Oʻzbekiston teleradiokompaniyasida rejissyor yordamchiligidan boshlagan.
Husan Musaboyev "Bozor koʻrmagan yigit" videospektakli, "Ajoyib xayolparast", "Aldamadim, hazillashdim", "Sumalak kasting yoxud uchmagan varrak", "Zuhraxonning sinfi", "Kunlardan bir kun", Er bermoq - jon bermoq", "Oʻgʻrigina kelin", "Men - bu men", "Chol va nabira", "Anora", "Abdullajon", "Qitmir kampir", "Voydod - 2", "Tosh tabib", “Hayot mamot”, "Ana xolos", "Dadam bilmasin", "Qora tanli bojalar", "Bebahoginam", "Begona bahor", "Kelgindi kelin", “Super xizmatkor”, "Jiblajibon" singari serial va filmlarda turli rollarni ijro etgan.
