Oʻzbekiston boʻylab tezkor tadbirlarda 112 kg giyohvandlik moddalari qoʻlga olindi

DXX hamda IIV tuzilmalari tomonidan joriy yilning 3-4 fevral kunlari mamlakat miqyosida “Qoradori” keng koʻlamli tadbirlarining dastlabki bosqichi olib borildi.

Giyohvandlik va kuchli taʼsir qiluvchi dori vositalarining noqonuniy muomalasi bilan shugʻullanib kelayotgan shaxslar va jinoiy guruhlar faoliyatiga chek qoʻyish maqsadida jami 653 ta maxsus tadbirlar oʻtkazildi.

Oʻtkazilgan tadbirlar davomida jami 112 kg 257 gr giyohvandlik vositalari (geroin, opiy, gashish, sintetik turdagi giyohvandlik vositalari) hamda 8601 dona kuchli taʼsir qiluvchi dori vositalarining aholi orasida tarqatilishi toʻxtatib qolindi.

Giyohvandlik vositalarining noqonuniy muomalasidan olingan 287 ming 460 AQSh dollari va 569 million soʻm miqdoridagi pullar daliliy ashyo sifatida rasmiylashtirildi.

Qoʻzgʻatilgan 222 ta jinoyat ishlari doirasida 228 nafar shaxslar jinoiy javobgarlikka tortildi. 64 nafar shaxslar maʼmuriy javobgarlikka tortildi. 47 nafar qidiruvdagi shaxslar ushlandi. 357 nafar shaxslar bilan profilaktik suhbatlar oʻtkazilib, 231 nafari rasmiy ogohlantirildi.

Shuningdek, keng koʻlamli tadbirlari doirasida 175 ta “tigʻ”, 58 ta “bita”, 24 ta “kastet” va 77 ta qurol olindi.

Kriminogen vaziyatni barqarorlashtirish borasidagi tezkor tadbirlar boshqa yoʻnalishlarda ham davom ettiriladi, deyiladi xabarda.